Жаңалықтар & афишалар

Абай – қазақ руханиятының мәңгілік темірқазығы

10 тамыз – «Абай күніне» орай А.С. Пушкин атындағы Шығыс Қазақстан облыстық кітапханасында «Атымды Абай қойған соң...» атты мерекелік бағдарлама салтанатты түрде өтті.

Абай мұрасын ұлықтауға арналған мазмұнды шаралар кітапхана алаңында ұйымдастырылып, ұлы ойшылдың тағылымды мұрасы дәріптелді.

Мерекелік жиында сөз алған өлкетанушы, этнограф Ермек Кәрімбекұлының тағылымды ой-пікірі мен ақын Назым Тауфикованың Абайға арнаған жүрекжарды жыры көпшілікке ерекше әсер сыйлады.

Шара барысында Гүлзат Хасенова мен Толқын Уызбаеваның орындауында Абай әндері шырқалып, кітапхана жастары қазақ, орыс, ағылшын және өзге де тілдерде ақын өлеңдерін мәнерлеп оқып, Абай мұрасының әлемдік деңгейдегі құндылығын айшықтай түсті.

Мерекелік бағдарлама аясында келушілерге арналған бірнеше танымдық әрі шығармашылық алаңдар жұмыс істеді. Қонақтар «Абайды оқы, таңырқа!» кітап көрмесімен танысып, «Қара сөз» алаңында ұлы ойшылдың нақылдары жайлы пікір алмасты, «Абайға хат» бұрышында ақынға арнаған жүрекжарды лебіздерін жазды. Сонымен қатар «Мен бір жұмбақ адаммын...» интеллектуалдық ойынына қатысып, «Ашық микрофон» алаңында Абай өлеңдері мен өз шығармаларын оқыды. Балаларға арналған шығармашылық кеңістікте сурет салып, ақын өлеңдерін жатқа айтып, рухани мерекенің ажарын аша түсті. Кітапханаға жаңадан тіркелген оқырмандарға естелік сыйлықтар табысталды.

Салтанатты шара соңынан өткен «Жаһандану заманындағы Абайды танытудың жаңаша бағыттары» атты әдеби рингке «Төр Алтай» клубының мүшелері қатысты. TED форматында өрбіген әдеби пікірталаста «TikTok-та Абайды насихаттау – заман талабы ма?», «Қазіргі жастар Абайды түсінбейді ме, әлде біз дұрыс түсіндіре алмай жүрміз бе?», «Жасанды интеллект Абайды алмастыра ала ма?», «Абай бүгін өмір сүрсе, қандай тақырыптарды көтерер еді?» сынды өзекті сауалдар төңірегінде қызу пікір алмасу өрбіді. Қатысушылар өз көзқарастарын дәлелдеп, ұлттық руханиятты жаңа форматта насихаттаудың тың идеяларын ортаға салды.

Абай күніне арналған бұл тағылымды мереке ұлы ақын мұрасының өміршеңдігін тағы бір мәрте айғақтап, кітапхана оқырман қауымды ұлы ақынның мәңгілік мұрасымен тағы бір мәрте табыстырды.

Абай сөзі – халықтың рухани темірқазығы, ал оны насихаттау – өткенге құрмет қана емес, болашаққа бағдар.

Құрметті қазақстандықтар!

Сіздерді Кітап оқу мәдениеті бойынша ұлттық сауалнамаға қатысуға шақырамыз.
Сіздің пікіріңіз Қазақстандағы кітап оқу мәдениетін дамытуға, кітаптар мен кітапханалардың қолжетімділігі мен тартымдылығын арттыруға бағытталған шешімдерді әзірлеуге ықпал етеді.
✅ Сауалнама анонимді
‼️ 14 жастан асқан Қазақстан тұрғындары қатысады
? Төмендегі сілтемеге өтіп, өз пікіріңізді қалдырыңыз.
Қазақ тілінде https://forms.gle/u6HaM9GjAZKttMPj6

«Ауылдан Алматыға дейін»: шығармашылық кеш

23 шілде күні А.С. Пушкин атындағы Шығыс Қазақстан облыстық кітапханасында «Ауылдан Алматыға дейін» атты тағылымды шығармашылық кеші өтті. Шараның басты қонағы – Атырау өңірінің тумасы, Қазақстан және Қырғызстан Республикаларының Мәдениет саласының үздігі, Қазақстан Жазушылар одағының мүшесі, белгілі айтыскер ақын Шалқарбай Сайлаубайұлы Ізбасаров.

«Алтын тау Алтайым» атты кітабының тұсаукесері

3 шілде күні кітапханада әнші-сазгер, мәдениет саласының ардагері Серік Сұлтанғалиұлы Бабахановтың «Алтын тау Алтайым» атты кітабының тұсаукесер кеші өтті. Ұлттық домбыра күні қарсаңында ұйымдастырылған тағылымды басқосу қазақ ән өнерін қадірлейтін қауымның басын қосты.
Кештің шымылдығы Серік Бабахановтың сөзіне жазылған «Менің қос бәйтерегім» әнімен түрілді.

"Журналистика жүрек ісі" кездесу

30 маусым күні кітапханада белгілі журналист, Қазақстан Журналистер одағының мүшесі, облыстық «Дидар» газетінің ардагері, ақын Ғафура Сәрсенбайқызымен кездесу өтті.

«Дарын» мемлекеттік жастар сыйлығына байқау жарияланды

Қазақстан Республикасының Мәдениет және ақпарат министрлігі дарынды жастарды қолдау және оларды одан әрі ынталандыру мақсатында «Дарын» мемлекеттік жастар сыйлығын тағайындауға байқау басталғаны туралы хабарлайды.

Ағымдағы жылдың аяғына дейін 10 номинация бойынша лауреаттар анықталатын болады. Сыйлық туралы хабарландыру Министрліктің ресми сайтында https://www.gov.kz/memleket/entities/mam/press/news/details/1242087?lang=kk сілтемесі арқылы орналастырылған.

Аталған конкурсқа өтінімдер ұсыну 2026 жылдың 17 маусымынан бастап 17 қыркүйек аралығы жүргізіледі.

«Бақытты ғұмыр» кітабының тұсаукесері өтті

2026 жылғы 8 маусым күні А.С. Пушкин атындағы Шығыс Қазақстан облыстық кітапханасында ғалым, экономика ғылымдарының кандидаты, қауымдастырылған профессор Ғалымжан Есқараұлы Керімбектің «Бақытты ғұмыр» атты жаңа кітабының тұсаукесері өтті.

«Мен- Алтайдан ұшқан Ақсұңқар» кездесу

11 маусым күні кітапханада ақын, әнші, аудармашы, журналист, Қазақстан Жазушылар және Журналистер одағының мүшесі, Халықаралық «Алаш» әдеби сыйлығының лауреаты Ақсұңқар Ақынбабақызымен «Алтай – Алатау арасы...» атты шығармашылық кездесу өтті.